Ինչպե՞ս ստեղծել առողջ քնի ռեժիմ

  Քունը ոչ միայն մեր էներգիայի վերականգնման միջոցն է, այլև ֆիզիկական առողջության, հոգեկան հավասարակշռության հիմնասյունը։ Ժամանակակից աշխարհում, երբ մարդիկ տառապում են քնի պակասից, անկանոն քնի ժամերից կամ անքնությունից, առողջ քնի ռեժիմ ստեղծելը դարձել է մի խնդիր, որը պահանջում է գիտական մոտեցում, ինքնաճանաչողություն և կարգապահություն։

Նախ եկեք պարզենք՝ ինչ դեր ունի քունը մեր օրգանիզմում։

Քունը օրգանիզմի կենսաբանական «վերագործարկման» փուլն է։ Այդ ընթացքում վերականգնվում է ուղեղի աշխատանքը, կարգավորվում են հորմոնները, ամրապնդվում է իմունային համակարգը։ Մարդու օրգանիզմն ունի բնական ցիկլեր, որոնք կոչվում են «ցիրկադային ռիթմեր»։ Դրանք որոշում են՝ երբ ենք զարթնում, երբ ենք քնում, և ինչպես է սինխրոնացվում մեր կենսաբանական ժամացույցը արևի լույսի հետ։ Անկանոն քունը խաթարում է այդ համակարգը՝ առաջացնելով ֆիզիկական և հոգեբանական հետևանքներ՝ սկսած անհանգստությունից մինչև լուրջ առողջական խնդիրներ։

Որո՞նք են առողջ քնի ռեժիմի հիմնական բաղադրիչները

1. Մշտական քնելու և զարթնելու ժամեր

Մարմինը սիրում է կարգուկանոն։ Երբ ամեն օր նույն ժամին եք գնում քնելու և զարթնում, մարմինը հարմարվում է այդ ռիթմին՝ հեշտացնելով քունը և խորացնելով դրա որակը։

2. Քնի բավարար տևողություն

Մեծահասակ մարդուն անհրաժեշտ է միջինը 7–9 ժամ քուն։ Կարճ կամ երկար քունը կարող է խաթարել կենսաբանական ցիկլերը։

3. Քնելու հարմար միջավայր

Սենյակը պետք է լինի մութ, հանգիստ, զով և առանց տեխնոլոգիական սարքերի լուսարձակող լույսերի։ Ցանկալի է հեռացնել հեռախոսը, հեռուստացույցը, կամ համակարգիչը քնելու սենյակից։

4. Հրաժարվել հեռախոսի էկրանից քնելուց առաջ

Էկրանի կապույտ լույսը ճնշում է մելատոնինի՝ քնի հորմոնի արտադրությունը։ Խորհուրդ է տրվում քնելուց առնվազն մեկ ժամ առաջ դադարեցնել էկրանի՝ լույսի, օգտագործումը։

5. Բնական լույսի հետ համահունչ լինել

Արևի լույսն օգնում է վերակարգավորել օրգանիզմի բնական ռիթմերը։ Ցերեկը հնարավորինս շատ ժամանակ անցկացրեք բացօթյա, հատկապես առավոտյան ժամերին։

Ի՞նչ պետք է անել քնելուց առաջ

Ցանկացած ռեժիմ սկսվում է փոքր սովորույթներից։ Առաջարկվող օգտակար արարողությունները կարող են օգնել մարմնին հասկանալու, որ ժամանակն է հանգստանալու․

•Տաք լոգանք կամ ոտքերի լվացում

•Խորը շնչառության վարժություններ կամ մեդիտացի

•Թեթև ընթերցանություն

•Թեյ առանց կոֆեինի՝ օրինակ՝ երիցուկի կամ նանայի

 Ի՞նչ չպետք է անել քնելուց առաջ

•Կոֆեին՝ սուրճը, կանաչ թեյը, նույնիսկ շոկոլադը կարող են խանգարել քնի խորացմանը։

•Ծանր սնունդ՝ լեցուն ստամոքսը խոչընդոտում է հանգիստ քունը։

•Սթրեսային բովանդակությամբ ֆիլմեր կամ գրքեր՝ դրանք բարձրացնում են սրտի ռիթմը և ակտիվացնում ուղեղը։

Առողջ քնի ռեժիմը ոչ թե սահմանափակում է ձեր ազատությունը, այլ նպաստում է էներգիայով լի, հանգիստ ու կայուն կյանքի։ Քունը ներդրում է ձեր առողջության, սրտի, մտքի ու նույնիսկ մաշկի գեղեցկության մեջ։ Սկսեք փոքրիկ փոփոխություններից՝ քնելու ժամից 15 րոպե շուտ անկողին մտնելով, և մարմինն ու միտքը կպատասխանեն երախտագիտությամբ։