Նեյրոմարքեթինգը ռեստորաններում. ինչպե՞ս ազդել ճաշատեսակի ընտրության վրա

 Ռեստորանային բիզնեսում ամենակարևոր խնդիրներից մեկը հաջողված մենյու կազմելն է, որը ոչ միայն կլինի հաճելի, այլ նաև շահույթ կապահովի ռեստորանային բիզնեսին։ Մենյուի օպտիմալացման և այն իդեալական դարձնելու համար հաճախ մեծ գումարներ և ժամանակ է ծախսվում, ուստի կազմակերպիչները պետք է իրենք ապահովեն իրենց արդյունքը, բայց ինչպե՞ս։ Իրականում կան հնարքներ, օրինակ՝ նեյրոմարքեթինգը, որի միջոցով ռեստորանային բիզնեսները ազդում են հաճախորդների վրա՝ նրանց ստիպելով և դրդելով անպայման պատվեր գրանցել և այն էլ, բավականին թանկ արժեքներով։

Հայտնի է, որ մենյուն ուսումնասիրելու համար մարդիկ սովորաբար ծախսում են 109 վայրկյան: Ռեստորանները գիտեն դա և այնպես են կազմում իրենց մենյուն, որ ոչ մի վայրկյանն իզուր չանցնի: Ճանաչված ռեստորաններից շատերը դիմում են նեյրոմարքեթինգային հնարքների` հաճախորդներին համոզելով պատվիրել մեծ շահույթ բերող ուտեստներ: Շատերը գիտեն գինու քարտերի մեթոդի մասին. ռեստորանները հաճախ առաջարկում են այն գինին, որը բերում է ամենամեծ շահույթը, երկրորդն այն, որն էժան է: Սա հաշվարկված է այն այցելուների համար, ովքեր չեն ուզում ագահ երևալ, բայց ամեն դեպքում ցանկանում են խնայել:

Եկեք ծանոթանանք նեյրոմարքեթինգի մի քանի մեթոդի, որով ռեստորաններն ազդում են հաճախորդների վրա:

Ճաշատեսակների դասավորության հերթականություն

Ուսումնասիրություններն ապացուցել են, որ հիմնականում մարդիկ պատվիրում են ցուցակի սկզբում եղած ճաշատեսակները (այցելուների 35%-ը պատվիրում է առաջին ճաշատեսակը): Այդ պատճառով առավել եկամտաբեր ճաշատեսակները լինում են մենյուի սկզբում, իսկ ոչ այդքան եկամտաբերները՝ ներքևի հատվածում կամ ցանկի վերջում: Սա կոչվում է «Հաջորդականության ազդեցություն» (Serial Position Effect):

Ընտրության պարադոքս

Կարճ մենյուն ավելի մեծ հնարավորություն է տալիս հաճախորդին համոզելու ընտրել թանկ ուտեստ:

Արժույթի նշանի բացակայություն

Սա համեմատաբար վերջերս առաջացած թրենդ է, որը եկել է հոգեբանությունից։ Եթե դուք մենյուի մեջ նշում եք սթեյքը 3600, այլ ոչ թե «3600 դրամ», ապա դա թուլացնում է գումարի հետ կապված ասոցիացիաներն ու քչացնում է այսպես կոչված «վճարման ցավը» (Pain of Paying):

Կրեատիվ նկարագրություն

Ուսումնասիրությունները ցույց են տալիս, որ նկարագրության մեջ «մայրիկ», «տատիկ» և հարազատ այլ  բառեր ավելացնելն ավելի գրավիչ է դարձնում մենյուն:  Դա պայմանավորված է մետաֆորների ազդեցությամբ (Metaphor Efect). մենք հասկանում և ավելի լավ հիշում ենք մեր երևակայությունն ակտիվացնող տեքստերը: Ահա թե ինչու կարող եք մենյուներում հանդիպել «սիրելի տատիկի խնձորի կարկանդակ» նկարագրությունը: Հաճախ կարելի է հանդիպել նաև, ըստ էության անիմաստ, բայց դրական ազդեցություն ունեցող ածականներ, օրինակ՝ «թարմ աղցան», «գյուղական կարտոֆիլ» և այլն: