Chupa-Chups

Աշխարհում ամենահայտնի փայտիկի վրա կոնֆետը` Chupa-Chups հայտնվել է 1958 թվականին: Նրանց հայր կարելի է համարել Chupa Chups Group ընկերության հիմնադիր Էնրիկ Բեռնատը: Լինելով ժառանգական հրուշակագործ նա ղեկավարում էր հարազատ Իսպանիայում հրուշակեղենի արտադրամասը, որը կրում էր Granja Asturias S.A. անունը:

1958 թվականին հրուշակագործը միտք հղացավ ուսումնասիրել իր հաճախորդների նախասիրությունները. մի բան, որ այդ տարիներին հանդիսանում էր ոչ այդքան  հայտնի մարքեթինգային հետազոտություն: Ֆրանսիական խորհրդատվական կազմակերպության ուսումնասիրություններից հետո Բերնատը ստացավ շատ հետաքրքիր տվյալներ: Պարզվեց, որ իր արտադրանքի հիմնական սպառողների տարիքը չի գերազանցում 16 տարեկանը, ինչը շատ զարմանալի էր, քանի որ աիտադրանքի ներդրման ժամանակ հաշվի են առնվել միայն հասուն տարիքի մարդկանց նախասիրությունները: Ելնելով ներկայացված արդյունքներից` նա որոշում է ստեղծել ինչ-որ քաղցրավենիք, որը դուր կգա ոչ միայն մեծահասակներին, այլ առաջին հերթին երեխաներին:

Հատուկ երեխաների համար ստեղծված քաղցրավենիքը պետք է նաև լուծեր քաղցավենիքի և փոքրիկների միջև ծագած այնպիսի բարդույթներ ինչպիսիք են կպչուն թաթիկները, կեղտոտ հագուստը, շոկոլադով լղոզված ծնողներն ու արվեստորեն քաղցրով պատված կահույքը: Chupa Chups կոնֆետի գաղափարը միաժամանակ պարզ էր ու փայլուն. քաղցրավենիքը հագցնել ոչ մեծ պատառաքաղի վրա, որից կբռնի փոքրիկը: Հետագայում պատառաքաղը փոխարինվեց փայտիկով, իսկ ավելի ուշ պլասմասե ձողիկով: Այդպես հայտնվեցին հանրահայտ սառնաշաքարները փայտիկի վրա: Քանի որ սառնաշաքարները կլոր էին և իրենց տեսքով հիշեցնում էին ֆուտբոլի գնդակ, կոնֆետների առաջին անունը եղել է GOL,  որը թարգմանաբար նշանակում է գոլ:  Սակայն դա դուր չէր գալիս կազմակերպության  տիրոջը և անվանումը սկզբում փոխեցին  «chupar», որը իսպաներենից թարգմանաբար նշանակում էր լպստել, իսկ հետագայում մեզ հայտնի Chupa Chups: Անունը և ապրանքանիշը պաշտոնապես գրանցվեցին 1962 թվականին: Շուկայում յուրօրինակ սառնաշաքարների  համբավը բերեց նրան, որ կազմակերպությունը վերանվանվեց Chupa Chups S.A.:

Chupa Chups-ի պատմության մեջ հետաքրքիր փաստ է այն, որ ապրանքանիշի նախագծումը, որն ընդհանուր առմամբ գոյատևել է մինչ օրս, մշակվել է Սալվադոր Դալիի կողմից: 1969-ին Էնրիկ Բերնաթը եկավ Ֆիգերեսին հանդիպելու Դալիի հետ և խնդրեց մեծ նկարիչին նկարել սառնաշաքարի համար լոգոն և ընդհանրապես զարգացնել իրենց տեսողական պատկերը: Դալին համաձայնեց, իհարկե ոչ անվարձահատույց, բայց այնուամենայնիվ, մի քանի ժամվա ընթացքում նկարիչը ստեղծեց Chupa-Chupps -ի լոգոն, որը նման է դաշույնի:

Իր յուրօրինակ արտաքինի, ինքնատիպ փաթեթավորման և իհարկե համային մեծ տեսականու շնորհիվ (ավելի քան հարյուր համ) մի քանի տարվա ընթացքում Chupa Chups կոնֆետները դարձան աշխարհում ամենաճանաչելի և ամենասիրելի սառնաշաքարները:  Հիմնական արտադրական հոսքագծերը գտնվում են Բարսելոնայից ոչ հեռու Սան-Էստեվե-Սեսրովիրեսում: 2006 թվականի հուլիսին Chupa-Chups Group-ը գնվեց Perfetti Van Melle S.p.A.–ի կողմից և դարձավ նրա առաջատար բրենդը:

Աննա Առաքելովա