Դիզայնի դերակատարությունը

  Ցանկացած գովազդի դիզայնի համար կիրառվում են մի շարք սկզբունքներ: Ոման կարող են մի փոքր այլ տերմին օգտագործել, բայց դրանից կիրառվող մեթոդները չեն փոխվի: Ստորև թվարկված դիզայնի սկզբունքների պատշաճ կիրառումը կգրավի և կստիպի ընթերցողին կարդալ գովազդային հաղորդագրությունը:

  Ոճի միասնություն: Բոլոր կրեատիվ գովազդներն առանձնանում են ոճի միասնությամբ: Վերջնական կոմպոզիցիան դիտվում է որպես փոխկապվածությունների միասնական ամբողջություն (տեքստ, գրաֆիկա, վերնագիր, լոգո և այլն): Կատարման միասնականության բացակայության ժամանակ հայտարարությունը փլուզվում է՝ վերածվելով առանձին մասերից կազմված կույտի: Գուցե և ոճի միասնությունը կարելի՞ է համարել հաջողակ գովազդային հաղորդագրության դիզայնի հիմնական սկզբունք:

  Ներդաշնակություն: Ոճի միասնականության հետ սերտորեն կապված է այն գաղափարը, որ կոմպոզիցիայի բոլոր տարրերը պետք է համակցվեն միմյանց հետ: Ներդաշնակությունը ձեռք է բերվում համադրելի տարրերի ընտրությամբ: Գովազդային հաղորդագրության մեջ չպետք է լինեն տարբեր ձևերի ու չափերի ֆոնտեր, նկարազարդումներ և այլն:

  Կանոնակարգվածություն: Հայտարարության մասնիկները պետք է ունենան այնպիսի հաջորդականություն, որ ընթերցողի ուշադրությունը ուղղորդի ճիշտ ուղղությամբ: Պետք է տարրերն այնպես տեղակայվեն, որ դիտորդի ուշադրությունը հառնի հենց այն կետին, որտեղ դուք ի սկզբանե մտադրվել էիք և շարժվի որոշակի հետագծով: Ամենատարածված կարգավորումը Z և S տառերի տեսքն է:

  Էմֆազ: Էմֆազը ընդհանուր ֆոնին առանձնանալու համար տարրերի (կամ նրանց խմբի) շեշտադրումն է: Պետք է որոշեք, թե ինչի վրա եք ուզում շեշտադրում անել՝ նկարի, վերնագրի, լոգոյի թե հիմնական տեքստի: Եթե այս բոլոր տարրերը ընկալվեն համարժեք, ապա դուք չեք ստանա էմֆազ:

  Հակադրություն (կոնտրաստ): Որպեսզի գովազդը տեսողականի համար չլինի ձանձրալի, այն պետք է ունենա տարբեր չափեր, ձևեր կամ երանգներ: Տառերի հաստ գրվածքը կամ միջտառային հեռավորությունների մեծացումը բառի նկատմամբ ուշադրություն են գրավում անմիջապես և տառատեսակների միջև ստեղծում կոնտրաստ: Վերջինս կոմպոզիցիան ավելի հետաքրքիր է դարձնում:

  Հավասարակշռություն: Հավասարակշռություն ասելով հասկանում ենք գովազդի տարրերի չափը, դիրքն ու կշիռը: Հավասարակշռված տարրերը հանգիստ ու բնական են նայվում: Դուք կարող եք ուղղել հավասարակշռությունը ՝ համեմատելով գովազդի աջ և ձախ կողմերը: Գոյություն ունի հավասարակշռության երկու տեսակ՝ ֆորմալ և ոչ ֆորմալ:

  Գույն: Գույնը գովազդի առավել ունիվերսալ տարրերից մեկն է, որի միջոցով գույներին հնարավորություն է ընձեռվում գրավել ուշադրություն, ստեղծել տրամադրություն: Ապրանքի և գովազդի ուզզվածությունից կախված՝ գույնը կարող է տարբեր ձևերով կիրառվել: Գովազդվող ապրանքը բոլորի համար կարող է թվալ անհրապույր, բայց այն մարդու համար, ում բարօրությունը կախված է վերջինիս վաճառքից, այն շատ գեղեցիկ է:

  Գույնի օգնությամբ ապրանքի տարբերակման դասական օրինակ ՝ ցավազրկող Nurpin դեղը: Դեղահաբերի դեղին գույնի շնորհիվ հնարավոր եղավ ընդլայնել շուկայում նրա մասնաբաժինը: Գույնի օգտագործման միտքը ծագեց այն ժամանակ, երբ կրեատիվ տնօրենը սեղանին լցրեց մի շարք ցավազրկող դեղահաբեր և նկատեց, որ միայն Nurpin-ն ունի դեղին գույն: Այդպես ծնվեց <<Դեղին դեղահաբ>> գովազդային արշավը:

  Հոգեբանական տեսանկյունից գույնը չափազանց կարևոր է և՛ ապրանքի գովազդի, և՛ արտաքին տեսքի, և՛ փաթեթավորման համար:  Տարեցտարի իրականացվող հետազոտությունները հաստատում են, որ գույնը բարձրացնում է գովազդի գրավչությունը:

  Գույնը որպես ուշադրություն գրավելու միջոց: Բացառությամբ հազվագյուտ դեպքերի, մարդիկ ավելի հաճախ նկատում են գունավորը, քան սև-սպիտակը: Որոշ ապրանքներ կարող են ռեալիստորեն պատկերվել միայն գույներով: Կահույքը, սնունդը, հագուստն ու նորաձևության պարագաները, կոսմետիկան կկորցնեն իրենց հմայքը, եթե դրանք գովազդվեն սև-սպիտակ: Pantone Գույնի Ինստիտուտի մասնագետները խնդրեցին մասնակիցներին նշել սիրելի գույները որոշակի ապրանքային կատեգորիաներում: Բացի այդ, հարցաշարում անհրաժեշտ էր նշել ժողովրդագրական տվյալները և դասակարգել սեփական անձն ըստ անվանակարգերի՝ <<կշռադատված>>, <<բռնկվող>>, <<հոռետեսական>>, <<ավանդական>> և <<գոռոզ>>: Այնպիսի ապրանքների միջև, ինչպիսիք են օրինակ ներկայացուցչական և էկոնոմ դասի մեքենաները, բացահայտվեցին գունային նախապատվությունների էական տարբերություններ:

  Ըստ  Pantone Գույնի Ինստիտուտի գործադիր տնօրեն Լեատրիս Էյսմանի, գույնի ուժը կարող է օգտագործվել ապրանքի կամ գովազդի հանդեպ ուշադրություն գրավելու համար: Եթե գովազդն առանձնանում է ընդհանուր գունային ֆոնի վրա, այն ընթերցողների մոտ մեծ հետաքրքրություն է առաջացնում: Ապրանք նախագծողները, որպեսզի իրենց ապրանքը նոր տեսք ունենա, փորձում են կիրառել օրիգինալ, նախկինում ոչ մեկի կողմից չօգտագործված գույներ: Այս ոլորտում նորարարություն են համարվում քամելեոն գույները, որոնք փոխում են գույնը կախված դիտարկման տեսանկյունից:

  Ազատ տարածություն: Որոշ դիզայներներ այնքան են տարվում պատկերներով, որ մոռանում են սպիտակ (դատարկ) տարածության մասին: Այստեղ գլխավոր կանոնը ծայրերից ազատ տեղ թողելն է: Կենտրոնում շատ սպիտակ հատվածը կարող է ոչնչոցնել կոմպոզիցիայի միասնությունը. Ընթերցողը չի հասկանում, թե որ կողմ պետք է ուղղի հայացքը:

   Դե ինչ, մնում է ստեղծագործել՝ չմոռանալով հիմնական սկզբունքները:

By Anna Araqelova